Hafstadfjellet speglar seg i fasaden på det nye administrasjonsbygget til Magne Hafstad i Førde. Entreprenøren jobbar mykje med stein, og det viser godt igjen på nybygget.
- Bygget blir steintøft, seier prosjektleiar Roald Ask i Gravdal Bygg.

- Klart det er stas at vi vann byggekonkurransen. Det blir eit fantastisk flott bygg med høge kvalitetar, seier prosjektleiar Roald Ask i Gravdal Bygg. Han styrer arbeidet på byggeplassen.

Ask er ikkje så reint lite stolt når han viser rundt i bygget, som er på 1000 kvadratmeter.
Sjølve fasaden er dekt av svart slipt og polert stein . Inngangspartiet er forma som ei fjellsprekk
i naturstein som går innover i vestibylen.
- Her blir det høgt under taket, store glasflater og ein spesiell takhimling med spiler i eik.
Golvet i administrasjonsdelen blir i slipt og polert betong som får fram steinstrukturen,
det blir nesten som marmor, fortel Ask.

Utvendig er det ikkje så veldig mykje som står igjen før bygget er klart. Innvendig vert det jobba
for fullt for å få bygget ferdig i april 2020. I tillegg til administrasjonsdelen med stor kantine,
er det tre hallar: lager-, verkstad- og vaskehall på baksida av bygget.